Prezidenti Konsellu Munisipal Konbatentes Libertasaun Nasional Munisipio Likisa Vicenti da Conceição ( Rai Los ) rekomenda ba Ministerio Agrikultura no Peska atu hadia irigasaun iha Loes hodi bele fo oportunidade ba povu agrikultor hasae produsaun agrikula.
Rai los hato’o lia hirak nee iha serimonia kolleta batar husi koperativa CCLN iha suku Lisadila Postu Administrativu Maubara kuarta feira nee.
“ haree ba irigasaun neebe iha fo impaktu ba komunidade liuliu ba koperativa ccln ami presiza irigasaun neebe diak no adekuadu hodi nunee ami bele sustenta produsaunn neebe ami halao.”
Nia hatutan produsaun agrikula menus impaktu husi irigasaun neebe ladiak .
“ menus produsaun tanba kestaun balu liga ba irigasaun neebe la kompletu ne la fo sustentabilidade ba natar nain sira atu hasae produsaun ,tamba nee husu ministru atu tau orsamentu fazeadamente hodi hare ba kestaun nee.”
Vise Ministru Agrikultura no Peska Abilio Xavier de Araujo hateten Governu sei la taka matan ba preokupasaun hotu komunidade nian,maibe importante maka ema hotu tenki senti nain ba sasan neebe governu halo.
“ ministerio sempre tau atensaun ba koperativa hotu neebe eziste iha timor ,kuandu ba iha ministerio sempre rona hodi responde tuir kapasidade governu nian.”
Ministerio agrikultura mos apela ba komunidade hotu atu kuidadu sasan neebe governu oferese hodi apoio servisu agrikultor nian ba tempu naruk
