Manorin sira husu Edukasaun atu Servisu hamutuk ho Asosiasaun Hak

Kinta-feira ne’e manorin sira husi Ensinu Sekúndariu no Ensinu Basiku Sentral husu Ministeriu Edukasaun atu servisu hamutuk ho asosiasaun hak liu-liu ba iha kurikulu, oinsa atu bele enkuadra konteudu istória Segunda Guerra Mundiál nian ba kurikulu nune’e manorin sira bele partilla ba estudante sira.
Manorin Jaco de Jesus Pereira husi eskola Ensinu Basiku 123 Fatumasi hato’o rekomendasaun hirak ne’e iha workshop ne’ebé realiza husi hak relasiona ho istória Segunda Guerra Mmundiál nian kona-ba Jugun Ianfu “Eskravidaun Seksual” durante okupasaun Militar Japonés iha Timor-Leste ba manorin nain sira iha Munisíipiu Liquiçá.
Iha okaziaun hanesan Direktór Asosiasaun Hak Feliciano da Costa Araujo explika asosiasaun hak iha inisiativa hodi hahu divulga istória ba manorin sira tamba manorin sira maka sai agente transformador ba estudante no sosiedade.
Manorin Jaco de Jesus Pereira afirma imformasaun ne’ebé sira hetan sai hanesan refernsia edukasaun públiku ba jerasaun foun atu labele haluha istória eskravidaun seksuál Militar Japonés no mós hanesan meius aprendizajen atu bele prevene kazu.