Kontinua lidera Suku Mota-Ulun ka lae ? Desizaun povu maka determina iha loron 28 fulan Outubro

Aktual Xefe Suku Mota-Ulun Francisco Soares hateten knaar nudar Xefe Suku Povu mak tula nudar responsabilidade hodi lidera Suku Mota-Ulun.
Francisco argumenta atu kontinua lidera Suku Mota –Ulun ou lae ne’e desizaun povu maka sei deside iha loron eleisaun nian ne’ebe sei monu iha loron 28 fulan Outubro Tinan ne’e.
Aktual Xefe Suku Mota Ulun ne’e haktuir nudar Xefe Suku durante nia mandatu tinan 7 konsege halo ona servisu barak, no barak mos seidauk halo tamba ne’e sai razaun ida hodi kontinua kandidata an ba Xefe Suku periodu tuir mai.
Nia promete bainhira la pasa iha eleisaun maka nia prontu fo apoio ba ida ne’ebe komunidade sira fo fiar hodi sai xefe Suku iha Mota-Ulun.
Kandidatu ba Xefe Suku Mota-Ulun hamutuk nain (5) nain (4 ) kandidatu foun no nain ida (1) re-kandidatu.
Francisco Soares husu ba populasaun sira ne’ebe atinji ona tinan 17 ba leten atu partisipa hotu iha eleisaun suku ne’ebe sei akontese iha loron 28 fulan Outobro Tinan ne’e.